पुण्यश्लोक अहिल्यादेवी होळकर शेतकरी कर्जमुक्ती योजना 2026

कर्जमुक्ती आणि प्रोत्साहनपर लाभासाठी ‘अॅग्रीस्टॅक’ नोंदणी बंधनकारक बीड, दि.8 (जिमाका) :- राज्य सरकारने जाहीर केलेल्या पुण्यश्लोक अहिल्यादेवी होळकर शेतकरी कर्जमुक्ती योजना 2026 चा लाभ मिळविण्यासाठी शेतकऱ्यांना आता आधार कार्ड आणि अॅग्रीस्टॅक नोंदणी क्रमांक देणे बंधनकारक करण्यात आले आहे. या क्रमांकाशिवाय कर्जमाफी किंवा प्रोत्साहनपर योजनेचा लाभ मिळणार नाही. तरी बीड जिल्ह्यातील सर्व पात्र शेतकऱ्यांनी ही नोंदणी तातडीने पूर्ण करावी, असे आवाहन जिल्हाधिकारी विवेक जॉन्सन आणि जिल्हा उपनिबंधक सतिश तोटावार यांनी केले आहे. पुण्यश्लोक अहिल्यादेवी होळकर शेतकरी कर्जमुक्ती योजनेअंतर्गत 1 एप्रिल 2019 ते 31 मार्च 2025 या कालावधीत घेतलेले अल्पमुदत पीक कर्ज, जे 30 सप्टेंबर 2025 पर्यंत थकीत होते आणि 31 मार्च 2026 पर्यंत त्याची परतफेड झालेली नाही, अशा शेतकऱ्यांना लाभ मिळेल. जमीन धारणेचे क्षेत्र विचारात न घेता, एका किंवा अनेक बँकांमधील मिळून जास्तीत जास्त 2 लाख रुपयांपर्यंतची मुद्दल व व्याजासह थकबाकी थेट कर्ज खात्यात जमा करून शेतकरी कर्जमुक्त केले जातील. तसेच ज्या नियमित कर्जदार शेतकऱ्यांनी 2022-23, 2023-24 आणि 2024-25 या तीन आर्थिक वर्षांपैकी कोणत्याही दोन वर्षांत पीक कर्जाची उचल करून वेळेत परतफेड केली आहे, त्यांना कमाल 50 हजार रुपयांपर्यंत प्रोत्साहनपर लाभ दिला जाणार आहे. अॅग्रीस्टॅक नोंदणीसाठी शेतकऱ्यांनी प्रथम आपला आधार कार्ड क्रमांक मोबाईल नंबरशी लिंक करणे आवश्यक आहे. आधार लिंक झाल्यानंतर अॅग्रीस्टॅक पोर्टलवर जाऊन आपली नोंदणी पूर्ण करावी. नोंदणीनंतर मिळणारा अॅग्रीस्टॅक नोंदणी क्रमांक आपल्या पीक कर्ज खाते असलेल्या बँकेत जमा करावा. ज्या शेतकऱ्यांकडे आधीपासूनच हा नोंदणी क्रमांक उपलब्ध आहे, परंतु त्यांनी तो अद्याप बँकेत जमा केलेला नाही, त्यांनीही तो त्वरित बँकेकडे सुपूर्द करावा. या क्रमांकाशिवाय कोणत्याही परिस्थितीत योजनेचा लाभ खात्यात जमा होणार नसल्याने शेतकऱ्यांनी ही प्रक्रिया तातडीने पूर्ण करावी. असेही जिल्हा उपनिबंधक, बीड यांनी कळविले आहे. -*-*-*-*- वृत्त क्र. :278 दिनांक : 8 जुलै 2026 प्रधानमंत्री किसान सन्मान निधी वितरीत बीड, दि.8 (जिमाका) :- प्रधानमंत्री किसान सन्मान निधी योजनेअंतर्गत 23 व्या हप्त्याअंतर्गत दि.20 जुन 2026 रोजी बीड जिल्ह्यातील पात्र 3,79,398 लाभार्थी शेतकऱ्यांना 75,87, 96, 000 रुपये वितरीत करण्यात आले आहेत. अशी माहिती पीएम किसान जिल्हा नोडल अधिकारी तथा जिल्हा अधिक्षक कृषी अधिकारी सुभाष साळवे यांनी दिली. बीड जिल्ह्यात तालुकानिहाय शेतकरी लाभार्थी संख्या अंबाजोगाई-31205, आष्टी-45836, बीड-57999, धारुर-18612, गेवराई-57609, केज-44724, माजलगाव-33238, परळी-26343, पाटोदा -22684, शिरुर कासार-26536, आणि वडवणी-15612 या प्रमाणे आहे. असेही कळविले आहे. -*-*-*-*- वृत्त क्र. :279 दिनांक : 8 जुलै 2026 इतर मागासवर्गीय प्रवर्गाच्या उमेदवारांना आवाहन बीड, दि.8 (जिमाका) :- राज्यातील इतर मागासवर्गीय प्रवर्गाच्या सर्वांगीण कल्याणासाठी कार्यरत असलेल्या महाराष्ट्र राज्य इतर मागासवर्गीय वित्त आणि विकास महामंडळांतर्गत विविध 13 उपकंपन्यांमार्फत बीड जिल्ह्यात सन 2026-27 या आर्थिक वर्षासाठी विविध कर्ज योजना राबविण्यात येत आहेत. या योजनांचा लाभ घेण्यासाठी पात्र उमेदवारांनी अर्ज करावेत, असे आवाहन महामंडळाचे बीड जिल्हा व्यवस्थापक बी. एस. भोसले यांनी केले आहे. महाराष्ट्र राज्य इतर मागासवर्गीय वित्त आणि विकास महामंडळ या महामंडळाअंतर्गत मुख्य महामंडळ, कंपनी व 13 उपकंपन्या मार्फत सन 2026-27 या आर्थिक वर्षासाठी 20 टक्के बिज भांडवल कर्ज योजना, 1 लक्ष थेट कर्ज योजना, वैयक्तिक कर्ज व्याज परतावा योजना, गट कर्ज परतावा योजना, शैक्षणिक कर्ज व्याज परतावा योजना व महिला स्वंयसिध्दी व्याज परतावा योजना अशा एकुण सहा योजना राबविण्यात येत आहेत. यापैकी 1 लक्ष थेट कर्ज योजना, वैयक्तिक कर्ज व्याज परतावा योजना, गट कर्ज योजना, शैक्षणिक कर्ज व्याज परतावा योजना व महिला स्वंयसिध्दी व्याज परतावा योजना या पुर्णपणे ऑनलाईन स्वरुपाच्या असुन इतर मागास प्रवर्गातील पात्र अर्जदारास नाव नोंदणीसाठी महामंडळाच्या www.msobcfdc.org या संकेतस्थळावर आवश्यक कागदपत्रासह अर्ज सादर करणे अनिवार्य आहे. उर्वरीत बिजभांडवल योजना हि ऑफलाईन स्वरुपाच्या असून त्याचे अर्ज जिल्हा कार्यालयामध्ये उपलब्ध आहेत. याबात अधिक माहितीकरीता महाराष्ट्र राज्य इतर मागासवर्गीय वित्त आणि विकास महामंडळ मर्या., जिल्हा कार्यालय, भारतरत्न डॉ. बाबासाहेब आंबेडकर सामाजिक न्याय भवन, शासकीय विश्रामगृहासमोर, नगर रोड, बीड दुरध्वनी क्रमांक 02442-232624 येथे संपर्क साधावा, असेही कळविले आहे. -*-*-*-*-