बीड, दि.7 :- बीड
जिल्ह्यातील शेतकऱ्यांच्या गरजा आणि भौगोलिक पार्श्वभूमी लक्षात घेवून कृषी विभागाने
कृषी विकासाच्या योजना अधिक प्रभावीपणे राबवाव्यात असे निर्देश जिल्हाधिकारी नवल किशोर
राम यांनी दिले.
कृषी विभागाअंतर्गत कृषी विस्तार कार्यक्रमांना विस्तार विषयक
सुधारणा करण्याकरीता 'आत्मा' प्रकल्पाच्या जिल्हा नियामक मंडळाची बैठक जिल्हाधिकारी
राम यांच्या अध्यक्षतेखाली घेण्यात आली. यावेळी ते बोलत होते. बैठकीस जिल्हा अधिक्षक
कृषी अधिकारी रमेश भताने, मानवलोकचे डॉ.द्वारकादास लोहिया, आत्माचे संचालक भास्कर कोळेकर
यांच्यासह विविध खात्यांचे अधिकारी व स्वयंसेवी संस्थांचे पदाधिकारी तसेच प्रगतीशील
शेतकरी सदस्य उपस्थित होते.
कृषी तंत्रज्ञान व्यवस्थापन यंत्रणा म्हणजे आत्मामार्फत राबविण्यात
येणाऱ्या कृषी विकासाच्या परंपरागत योजनांशिवाय स्थानिक गरजा व भौगोलिक परिस्थितीचा
अभ्यास करुन जास्तीत जास्त फायदेशीर शेतीबाबत जिल्ह्यातील शेतकऱ्यांना मार्गदर्शन करणे
गरजेचे आहे असे सांगून जिल्हाधिकारी राम पुढे म्हणाले की, जिल्ह्यात पावसाळ्यात चांगला
पाऊस झाला. भुगर्भातील पाण्याची पातळी वाढली. पाण्याच्या मुबलकतेमुळे पिक परिस्थितीही
चांगली राहणार असतांना जिल्ह्यात जानेवारी-फेब्रुवारी महिन्यात झालेल्या शेतकरी आत्महत्या सर्वांना चिंताग्रस्त
करणाऱ्या आहेत . परिस्थितीत सुधारणा झाली तरी शेतकरी आत्महत्या का झाल्या आहेत याचा
प्रत्यक्ष कुटूंबियांना भेटून कारण मिमांसा करण्याची गरज आहे. यासाठी आत्माअंतर्गत
प्रमुख अधिकारी व सदस्यांची समिती नेमण्यात यावी. या समितीने जानेवारी-फेब्रुवारीमध्ये
आत्महत्या केलेल्या शेतकऱ्यांच्या कुटूंबियांची भेट घेऊन त्यांची आर्थिक, मानसिक, कौटूंबिक
व सामाजिक पार्श्वभूमीचा अभ्यास करावा व तसा अहवाल सादर करावा. अहवालानूसार पुढील कार्यवाही
करण्यात येईल असेही ते म्हणाले.
यावेळी तूर खरेदी केंद्राच्या कामकाजाचा तसेच विविध कृषीविकास
योजनांच्या कामाचा आढावा घेण्यात आला. शासनाने प्रत्येक जिल्ह्याला कृषी महोत्सव आयोजित
करण्याचे निर्देश दिले आहेत. त्यानूसार एप्रिलमध्ये बीड येथे भव्य कृषी महोत्सवाचे
आयोजन करण्यात येणार आहे. यामध्ये अन्न धान्य विक्री, प्रदर्शन, मेळावा आदि उपक्रमांचा
समावेश असणार असून हा महोत्सव पाच दिवस भरणार आहे. यासाठी या बैठकीत प्राथमिक चर्चा
करण्यात आली. यावेळी आत्माअंतर्गत झालेल्या खर्चाचा व पुढील नियोजनाचा आढावा सादर करण्यात आला.
कोणत्याही टिप्पण्या नाहीत:
टिप्पणी पोस्ट करा