राष्ट्रीय निवृत्ती वेतनाबाबत बीड येथे प्रशिक्षण कार्यशाळा

     बीड, दि. 25 :- जिल्हा कोषागार कार्यालयाच्यावतीने बीड जिल्ह्यातील आहरण व संवितरण अधिकाऱ्यांसाठी एनपीएस म्हणजे राष्ट्रीय निवृत्ती वेतन योजनेमध्ये येणाऱ्या अडीअडचणी  निवारणासाठी कार्यशाळा आयोजित करण्यात आली होती. या कार्यशाळेस उत्तम प्रतिसाद मिळाला.

बीड येथील जिल्हाधिकारी कार्यालयातील जिल्हा नियोजन सभागृहामध्ये या प्रशिक्षणाचा शुभारंभ भूसंपादन उपजिल्हाधिकारी कल्याण बोडके यांच्या हस्ते करण्यात आला. यावेळी उपजिल्हाधिकारी (सामान्य) राजेंद्र वाघ, पाटोद्याचे उपविभागीय अधिकारी गणेश निऱ्हाळी, अपर कोषागार अधिकारी लहु गळगुंडे, अपर कोषागार अधिकारी (एनपीएस) एस.पी. कंटक, क्रक्स मॅनेजमेंट सर्व्हिसेस हैद्राबादचे प्रतिनिधी किरण अंगडी यांची व्यासपीठावर उपस्थिती होती.

या प्रशिक्षणाच्या प्रथम सत्रामध्ये क्रक्स मॅनेजमेंट सर्व्हिसेस हैद्राबादचे प्रतिनिधी किरण अंगडी   यांनी एनपीएस म्हणजे राष्ट्रीय निवृत्ती वेतन योजनेच्या अंमलबजावणीबाबत सविस्तर मार्गदर्शन केले. तसेच आहरण व संवितरण अधिकाऱ्यांनी उपस्थित केलेल्या शंका व अडी अडचणींचे निराकरण केले.  

या प्रशिक्षणाअंतर्गत दुपारच्या सत्रात अंबाजोगाई, परळी, वडवणी, व शिरुर (का) या तालुक्यातील आहरण व संवितरण अधिकाऱ्यांचे प्रशिक्षण झाले. यावेळी या तालुक्यातील आहरण व संवितरण अधिकारी व कर्मचारी उपस्थित होते. या प्रशिक्षणाच्या दुसऱ्या सत्रात  सकाळी बीड आणि  माजलगाव तालुक्यातील तर दुपारच्या सत्रात धारुर, केज, आष्टी, पाटोदा, गेवराई तालुक्यातील आहरण व संवितरण अधिकाऱ्यांचे प्रशिक्षण  होत आहे.